Эхын hайхан уурагhаа
Эхилдэг юм даа энэ наhан.
Эсэгын гэрэй үүдэнhээ
Эхилдэг юм даа холын харгы…
Энэ үгэнүүдые би «Буряад Үнэн» сэтгүүл соо уншааб. Намда ехэ һайшаагдаа.
Алтан дэлхэйн хүрьhые хүлѳѳрѳѳ шоройдохо зол жаргал намда хайрата аба эжы хоёрни бэлэглээ .
Би арбан хоёртойб. Энээхэн наhан соогоо хэhэн хэрэгүүдни яhала hайн үрэ дүнгүүдтэй.. Эдэ амжалтануудай эхин, арюухан булагтал, минии эхэ эсэгэhээ эхитэй. Абамни хүхюүтэй, шог зугаада дуратай, омог дорюун зантай, согтой залитай хүн байгаа. Минии ухаан бодолдо согтой галтайхан нюдѳѳрөө харан, зѳѳлэхэн дулаан гараараа намайе дээшэнь шэдэн, ташаганаса энеэлгэжэ байhань үлэнхэй. Халаг! Дан эртэ алтан дэлхээтэй хахасаал даа….
Эхымни бүхы сэдьхэлэй элшэ хүсэн намдаа зорюулагданхай. Бага наhанhаамни дахуулжа ажал хүдэлмэри хэжэ hургадаг, номдоо ехэ оролдосотой бай, зон нүхэдтэеэ сэхэ сэбэр харилсаатай яба гэжэ сэсэн hургаал заабаринуудые намдаа ходо хэлэдэг.
Υнгэрhэн хабарай hүүл hарада Санкт-Петербургдэ болоhон уран шүлэгэй мүрысѳѳндэ хабаадаха золтой байгааб. Намтай энэ баярыемни хүсэд дүүрэн хубаалдажа, намдаа хүдэр тулга боложо эжымни ябалсаа. Олон зон соо hанаанаймни хүлгүүтэйшэг болоходо, гарнуудыемни адхан, урин дулааханаар миhэрэн, аалихан номгон зангаараа сэдьхэлыемни сэхэлдюүлжэ шададаг лэ hэн. Холын нютагай нюур шарайтай, түүхэтэй, хариин зонтой танилсаха үедѳѳ эжытэеэ байhандаа шэдитэ орон соо ябаhандал үзэгдѳѳ…
Эжы, эжыхэмни… Эдэ үгэнүүд ухаан бодолдомни заха хизааргүй сэсэг набшаар дүүрэн нэмжыhэн таладал hайхан бодолнуудые түрүүлнэ.
Эжы, эжыхэмни… Эдэ үгэнүүд шэхэндэмни орьёл үндэр хадануудай сууряан мэтээр үзэгдэнэ
Эжы, эжыхэмни… Эдэ үгэнүүд сэдьхэлдэмни түүдэгэй соробхилжо байhан галдал, элшэ хүсэ нэмэнэ.
Би эхын ашые харюулжа шадаха гээшэ гүб? Оролдохоб!
Эгэтын-Адагай дунда hургуулиин 7-дохи ангиин hурагша
Цыбикжапова Цырен-Дулмын хүдэлмэри.
Хүтэлбэрилэгшэ: Ц.Ж.Гончикова, географиин багша.