Яруунын аймагай Нарһата һууриин
Цырен-Дулма Дымбрылова
Эжыдээ.
Хүрьһэтэ алтан дэлхэйдэ
Хүмүүнэй бэе заяаһан,
Түрэһэн эжымни тандаа,
Түрьбэлгүй ехэ баяртайб.
Нялха нарай үеһөөмни
Нааршаан хөөршөөн үргэһэн,
Эжымни танаа бурхандаал һанан,
Эгээл ехэ баяртайб.
Алибаа байдалай орёое ойлгуулан,
Эхын һургаал бүрин дамжуулһан,
Ажалша нягта эжымни тандаа,
Аргашьегүй ехэ баяртайб.
Бэри бууһан сагһаам эхилээд,
Байдалыемни заһалсаһан,
Хадам эжымни тандаа,
Хамагһаань ехэ баяртайб.
——————————————————————————————-
Угаараа малшанай үриби
Уужам тала махаһаар үндыгөөб.
Тэнгэриин шарай шарайшалааб эжытэеэ
Тэмдэгтэй мүшэдтэй танилсааб.
Огторгой замбиие оёоргүй гэгшэ һэн,
Уужам дэлхэйн хизааргүйе гайхадаг һэн,
Тохёолгон болохые хүйтэрхэ,дулаархые
Тордиһогүй таадаг һэн, эжымни.
——————————————————————————————-
Хадамуудтаа зорюулнаб.
Хадамуудаа мүнөө хайрланаб даа,
Хойноһоонь шаналан зальбарнаб.
Холоһоо бэри буухадамни даа,
Хүндэлжэ баярлажа угтаһан юм.
Наһатайшаг болоһон хадамуудни
Намдуу зохид зон һэн.
Ажабайдалынь бүхэриг,
Айл зондоош хүндэтэй һэн.
Ганса хүбүүгээ мөөрэжэ нэгэтэшье,
Газаашалжа намайе байгаагүй лэ,
Тэнэгшэн янзаар аашалхадамнишье,
Тэнсүүриинь оложо түбхинүүлээ.
Олон сурба ашанараа
Өөгшөөн нааршаан үргэлсөө,
Бодолтой сэсэн заабаряараа
Бэрхэ нягтаар һургалсаа.
Баабайнгаа нэрэ нэрлүүлжэ,
Буян хэшэгээ арьбадхажа,
Бултадаа үхибүүдни жаргаһай гээд,
Бурхандаа зальбаран һуугшаб даа.
Эхэ шулуундаа зальбарнаб.
Түрэһэн тоонто Хангилни,
Танил һайхан таламни,
Ходошье эрьежэ ерэнэгүйб.
Хадамай нютагта һуурижашаад,
Хонишон ажалтай эжыгээ дахаад,
Хониёо бэлшээдэг таламниш,
Хүүгэн наһан золтойл байна даа
Хайхарха энхэрхэ эжынгээ хажууда.
Хабсагай эрьетэй Ножын нуур
Хүүен шааян долгилогшо һэн,
Хужартай уһанһаань малнууд уһалаад,
Хүшэлжэ таргалжа зуһагша һэн.
Хажуудань ошохыемнай хоригшо һэн,
Холын сагай удамтай зоной
Хүүр гээбы гэдэг һэн.
Хонгор һайхан Ножын даланда
Хүһөө шулуун бурхан морилоо
Хүн бүхэндэ туһалха шадалтай,
Хирэ борыень арилгаха шэдитэй,
Оройн бурхад хараа бидэниие гэлсэбэ.
Оломнай архидана, үбдэнэ
Ахирхан маниие абархыень
Абарагша бурханиие залаа гэлсэбэ.
Эхэ шулуунда зорижо ошобоб,
Үбдэгтэнь унажа мүргэбэб,
Шэхэндэнь шэбэнэжэ зальбарбаб,
Эжыдээ адлишаажа уярбаб.
Эжымни нюдэн урихан һэн,
Зангынь номгон даруухан һэн,
Сэдьхэлынь һайхан сагаахан һэн,
Гарынь зөөлэхэн дулаахан һэн.